t Evengelie volgens Matteüs 16
01Farizeeërs en Sadduceeërs kwammen noar hom tou. Ze wollen hom oetdoagen heur n taiken oet hemel zain te loaten.
02Hai antwoordde: "As t oavend wordt, zeg ie: 'Mörgen goud weer! Lucht zugt ter ja zo mooi rood oet.'
03En smörgens: 'Vandoag störm! Lucht zugt ter ja zo gemain rood oet.' Aankiek van lucht doar wait ie ales van. Mor aankiek van dizze tied kin ie nait oetduden?
04Min volk, zunder vertraauw, vragt om n taiken, mor krigt gain aander te zain as Jona zienent." Hai ging vot en luit heur stoan.
05Leerlingen voarden noar overkaant. Loat ze nou t brood vergeten hebben!
06"Kiek goud oet," zee Jezus tegen heur. "Paas op veur zoerdaig van Farizeeërs en Sadduceeërs."
07Zai pruiten der onder nkander over deur: "Dat zegt e omdat wie gain brood mitnomen hebben."
08Jezus kreeg dat in de goaten. "Ie haalfwasgeleuvegen!" zee e. "Woarom heb ie t ter over dat ie gain broden bie joe hebben?
09Heb ie t nog altied nait onder t verstand? Denk ie den nait meer aan dij vief broden veur viefdoezend man? Houveul körf heb ie doar nait bie nkander hoald?
10 En den dij zeuven veur vaaierdoezend man, houveul ie doar nait bie nkander hoald hebben?
11 Hou is t meugelk! Heb ie nou nog nait deur dat ik t nait over gewoon brood haar? Nee, ie mouten oppazen veur Farizeeërs en Sadduceeërs heur zoerdaig!"
12 Dou eerst begrepen ze dat hai heur nait woarschaauwen wol veur zoerdaig dat in stoet bruukt wordt, mor veur dat, wat Farizeeërs en Sadduceeërs leren.
13 Dou Jezus in kontrainen van Caesarea Filippi kommen was, vruig e zien leerlingen: "Wat denken lu van Menskenzeun? Wèl is dat?"
14 "Gounent zeggen van Johannes de Deuper, aandern Elia en nog weer aandern Jeremia of ain van aander profeten!"
15 "En ie, woarveur hol ié mie?" vruig e.
16 Petrus gaf t antwoord: "Ie binnen de Messias, Zeun van God dij leeft."
17 "Doe bist n zegend man, Simon Barjona!" zee Jezus tegen hom. "Dat hestoe nait van die zulm, mor van mien Voader dij in hemel is.
18 Dit zeg ik die: doe bist Petrus, rots. En op dizze rots zel ik mien kerk baauwen. Macht van t dodenriek zel der gain boas over worden.
19 Ik zel die sleudels van t hemels keunenkriek geven. Wat ofstoe hier op eerde gelden letst dat zel in hemel gelden. En wat ofstoe hier op eerde nait gelden letst dat zel in hemel ook nait gelden."
20 Dou woarschaauwde hai zien leerlingen, ze zollen gain mensk vertellen: "Hai is de Messias."
21 Van dij tied òf aan begunde Jezus zien leerlingen dudelk te moaken dat e noar Jeruzalem mos en dat e slim te lieden kriegen zol van oldsten, hogepriesters en schriftgeleerden. Hai zol ombrocht worden en op daarde dag opwekt.
22 Petrus nam hom apaart en begunde hom t jak oet te vegen: "Mag God joe doar veur bewoaren, Heer! Dat zel joe nait overkommen!"
23 Hai draaide zok om noar Petrus. "Vot doe!" zee e. "Oet mien ogen vandoan, soatan! Bist mie n aargernis! Bist ja nait bedocht op wat God wil, mor op wat mensken willen."
24 Dou zee Jezus tegen zien leerlingen: "Wèl mit mie goan wil, mout nait aan zokzulm denken. Hai mout zien kruus op zok nemen en achter mie aan goan.
25 Want elkenain dij zien levent holden wil dij zel t verlaizen. Mor wèl of zien levent verlust om mie dij zel t vinden.
26 Wat het n mensk ter aan dat e haile wereld wint, mor doar zien aigen levent mit verknooit. Wat kin n mensk inzetten om zien levent weerom te kriegen?
27 Want Menskenzeun zel kommen mit zien engels in zien Voaders pracht en heerlekhaid. Den zel elk zien loon kriegen dat e verdaind het.
28 Zekerwoar! Ik zeg joe: maank mensken hier, binnen der gounent dij nait staarven zellen veurdat ze zain hebben dat Menskenzeun as keunenk komt."
|
